Nuk ka kthim pas, thotë një ditë pas protestës së dhunshme të opozitës që u mbyll në orën 20:00, sekretari i Përgjithshëm i Partisë Demokratike Gazmend Bardhi, por që njëjtë siç kryedemokrati Lulzim Basha që nuk e shpalli dje, protesta e radhës e radhës anti-qevertiare, nuk ka një datë.
Pas dhunës që shpërtheu tek Parlamenti, përdorimit të gazit lotsjellës pas tentativave për të sulmuar godinën, dhe djegies së një makine para Kuvendit, Bardhi bën përgjegjës ministrin e Brendshëm, Sandër Lleshaj. Sekretari i Përgjithshëm i PD-së, shkruan me thonjëza kur flet për policët që mbetën të plagosur në protestë, duke mos besuar se këto situata janë reale. Thotë se ishte një skenar i policisë për të lënë pranë Kuvendit vetëm një makinë, dhe se flaka, sipas tij, nuk i është vënë nga protestuesit.
Bardhi shprehet protesta solli bashkimin e shqiptarëve dhe frikë në mazhorancë.
“Janë të tmerruar nga bashkimi i shqiptareve! S’u mjaftoi gazi helmues dhe uji me presion, i përdorur në mënyrë kriminale kundër qytetareve. Turp! Llesh Kimiku sajoi skenare me djegie makinash false e policë “të dhunuar” për të mbuluar frikën e shefit te tij të vetmuar. Pas grabitjes në Rinas, djegia e makinës false dhe policë “te dhunuar” është “suksesi” i dytë i Llesh Kimikut në 3 ditë. Parlament me vota false, qeveri false, kryeministër fals!Shteti i Ramës ka marrë fund! Ne jemi shumica morale dhe politike! Nuk ka kthim pas!”, shkruan Bardhi në një postim në rrjetet sociale.
Pesë efektivë të policisë mbetën të lënduar, ndërkohë që disa prej tyre pësuan djegie në fytyrë si pasojë e hedhjes së kapsollave nga ana e militantëve të PD-së.
