Gjykata e Lezhës ka dënuar me 10 vite e 9 muaj burg 60- vjeçarin Mhill Gega, i cili në muajin shkurt të këtij viti përplasi me dashje me makinë bashkëfshatarin e tij Mark Gjeta në fshatin Bungaj të Mirditës. Organi i akuzës arriti të provojë se ngjarja ka qenë e qëllimshme dhe ndaj autorit është ngritur akuza e vrasjes me dashje. Trupa gjykuese e kryesuar nga gjyqtari Artan Hajredinaj e dënoi 60- vjeçarin me 16 vite burg, por duke qenë se përfitoi nga gjykimi i shkurtuar, Gega përfitoi ulje të dënimit me 1/3-n.
Ndërkohë, nga hetimet ka rezultuar se dy bashkëfshatarët kishin pasur konflikte prej dy vitesh me njëri-tjetrin dhe ditën e ngjarjes janë përplasur sërish. Pasi viktima me të birin e kishin fyer dhe dhunuar, 60-vjeçari Mhill Gega ka shkuar në shtëpi dhe ka marrë automjetin tip “Benz” duke përplasur për vdekje Mark Gjetën, i cili lëvizte në rrugën e fshatit.
KONFLIKTET
Në deklarimet e tij, vetë i pandehuri ka pranuar faktin se ka pasur konflikte me viktimën, por ka mohuar akuzën e ngritur ndaj tij, duke e konsideruar ngjarjen aksidentale, me pretendimin se i kishte rrëshqitur makina dhe ka goditur 68-vjeçarin Mark Gjeta. Por pretendimet e tij nuk janë marrë në konsideratë nga trupa gjykuese. Pas arrestimit, Gega deklaroi para hetuesve se viktima i kishte nxirë jetën në vazhdimësi duke e sharë dhe ofenduar, madje ka deklaruar se aktin e rëndë e ka kryer në gjaknxehtësi e sipër.
“Më ka nxirë jetën, duke më sharë, ofenduar e madje edhe dhunuar. Më ofendoi edhe ditën kur ndodhi ngjarja dhe në gjaknxehtësi e sipër kam marrë makinën dhe e kam goditur. Nuk desha të kryeja këtë krim, por gjithçka ishte e momentit”, mësohet të ketë thënë para hetuesve Mhill Gega. Vrasja me makinë ndodhi pasditen e 17 shkurtit të vitit 2021 në fshatin Bungaj të Bashkisë Mirditë.
Fillimisht u dyshua për aksident, por pas veprimeve hetimore në vendin e ngjarjes dhe dëshmive të marra, rezultoi se ngjarja ishte e qëllimshme. Goditja e fortë i shkaktoi vdekjen e menjëhershme 68-vjeçarit Mark Gjeta, ndërsa Policia e gjeti në banesë dhe prangosi autorin. Mark Gjeta dhe Mhill Gega kishin punuar për disa kohë në të njëjtën ndërmarrje dhe kishin qenë shokë me njëri-tjetrin, por marrëdhëniet e tyre nisën të acarohen për motive tërësisht banale, pasi viktima e tallte dhe ofendonte autorin.
