Pas një bisede telefonike që zgjati mbi dy orë mes presidentëve Donald Trump dhe Vladimir Putin, Rusia dhe SHBA po intensifikojnë përgatitjet për një samit të mundshëm mes dy liderëve.
Zëvendësministri i Jashtëm rus, Sergey Ryabkov, theksoi rëndësinë e përgatitjeve të kujdesshme, duke paralajmëruar se çdo hap i gabuar mund të ketë pasoja serioze.“Deri tani kemi vetëm një mirëkuptim në parim. Duhet të jemi shumë të kujdesshëm. Nuk ka vend për gabime apo dështime”, u shpreh ai, duke shtuar se përpara se të caktohet vendi i takimit, duhet të përcaktohet përmbajtja.
Fokusi kryesor i takimit pritet të jetë lufta në Ukrainë dhe mundësitë për një zgjidhje paqësore. Sipas Ryabkov, ende është shumë herët për të folur për një datë ose vend të saktë të samitit.
Ndërkohë, ndihmësi i presidentit Putin, Yury Ushakov, konfirmoi se të dy liderët janë të interesuar për një takim, por duan që ai të jetë vërtet produktiv.
Gjatë telefonatës, Kremlini deklaroi se Putin kishte shprehur gatishmërinë e Rusisë për një zgjidhje paqësore të konfliktit, duke theksuar nevojën për kompromise që të jenë të pranueshme për të dyja palët.
