Pushtimi i Ukrainës nga Rusia po sjell pasoja psikologjike te atletet, si tenistja bjelloruse Victoria Azarenka, e cila shpërtheu në lot në mes të ndeshjes kundër kazakes Elena Rybakina në Indian Wells.
Një orë pas ndeshjes, ku Rybakina dominoi me 6-3 dhe 2-2, Azarenka nuk i mbajti dot lotët kur do të bënte një shërbim. Bjellorusia, e cila garonte pa flamurin e vendit të saj, nuk ishte në gjendje ta fuste topin në lojë dhe iu desh të ndalonte. Azarenka u pa duke qarë dhe shumë e shqetësuar, teksa mezi ia doli të thoshte “Më fal, më vjen shumë keq” pasi arbitri iu afrua.
Publiku i pranishëm në tribunë tregoi mbështetjen e tij për Azarenka, e cila pas pak minutash arriti të qetësohej, megjithatë, Bjellorusi e humbi ndeshjen.
Para fillimit të turneut Indian Wells, Azarenka shkroi në rrjetet sociale se ishte e “shkatërruar” nga ajo që po ndodhte në Ukrainë .
“Jam e shkatërruar nga veprimet që kanë ndodhur ditët e fundit kundër dhe në Ukrainë. Është zemërthyese të shohësh se si jeta e kaq shumë njerëzve të pafajshëm po ndikohet nga dhuna. Që nga fëmijëria ime, kam parë gjithmonë ukrainasit dhe bjellorusët duke mbështetur njëri-tjetrin. Është e vështirë të dëshmosh ndarjen e dhunshme që po ndodh sot”, shkroi ajo.
