Deputeti i PD për Elbasanin, Luçiano Boçi rri rri por kur e godet qeverinë, e trondit nga themelet. Për tu dukur i zellshëm, ose ndoshta për shkak të ndonjë halli personal që ai siç thonë gojët e liga, i zgjidh gjithmonë “me armiqtë” e qeverisë, shpik ndonjë gjë si ky postimi i sotëm në facebookun e tij zyrtar, kur shkruan: “Ja si i bëhet presion punonjësve shëndetësorë për të plotësuar me zor numrin e personave që bëjnë check up-in. Kjo poshtë është sms-ja që i dërgohet atyre nëpërmjet drejtuesve të qendrave shëndetësore. Gjithçka vetëm e vetëm që Vilma të marrë 20 milionëshin e eurove, në shëndetësinë e rraskapitur shqiptare. Normal më pas që nuk mund të ketë as investime e as libra falas për fëmijët. Klientët janë prioritet i kësaj qeverisje.” Bukur deri këtu. Bravo Profesor Luçi. Por çfarë thotë mesazhi që ai ka postuar: “Me urdhër nga lart nëse nuk realizohet check up do të ketë penalizime sidomos për personelin e mesëm deri në pushim nga puna, klm.”. Kjo pjellë e fantazisë së Luçit, nuk ka as personin se kush e ka nisur mesazhin, as pozicionin zyrtar që ai mban, as institucionin që ai përfaqëson, as qytetin, as kush ështe ai që e ka dhënë urdhërin nga lart. Asgjë. E ç’rëndësi kanë të gjitha këto në fund të fundit! E rëndësishme është që Profesor Luçiano si anëtar edhe i komisionit Parlamentar të medias e di sesi funksionojnë gjërat në epokën e fake news-it. Ai njeh një reporter që punon në një portal që e boton këtë fantazi. Menjëherë dhe si lajm të bujshëm, madje. Të tjerat e marin siç është dhe e botojnë duke u shpërndarë si virusi gjithandej me shpejtësinë e dritës. Pak rëndësi ka e vërteta, parimi i dy burimeve të informimit, etj, etj. Më e rëndësishme se të gjitha këto është që Luçiano të mbarojë punët e veta, partisë ti thotë se sa shumë po e dëmton qeverinë dhe në fund, të gjithë jetuan të lumtur. Jeta vazhdon…
