Gjykata e Apelit për Krimet e Rënda vendosi të ndryshojë ditën e djeshme, masën e sigurisë ndaj biznesmenit Orest Sota, i cili, që prej 1 nëntorit, mbahej në burg. Kështu, sipas vendimit të dhënë ditën e djeshme, Orest Sota lirohet kundrejt garancisë pasurore, shkruan “Panorama”.
Burimet thonë se biznesmeni ka paguar 5 milionë lekë të reja garanci për të ndryshuar masën e sigurisë, nga arrest me burg në detyrim paraqitjeje. Që prej 1 nëntorit, Sota është vënë nën akuzë nga Prokuroria e Krimeve të Rënda për fshehje të të ardhurave, pastrim të produkteve të veprës penale, mosbindje ndaj urdhrit të Policisë dhe drejtim mjeti në mënyrë të parregullt.
Organi i akuzës dyshon se paratë e gjetura në mjetin e Sotës, lidhen me veprimtari kriminale të ish-ministrit Saimir Tahiri, ndaj ka bashkuar të dyja çështjet hetimore. Seanca e djeshme u zhvillua me dyer të mbyllura, ndërsa prezent në të ka qenë edhe babai i biznesmenit, shtetasi Lefter Sota.
Ndërkohë, pak çaste pas seancës, avokati i Sotës deklaroi se Prokuroria e Krimeve të Rënda nuk e ka marrë asnjëherë në pyetje klientin e tij. I vetmi procesverbal pyetjesh në dosje, është ai i Prokurorisë së Elbasanit, marrë ditën e arrestimit, në muajin nëntor. Ai këmbëngul se Sota është i pafajshëm dhe nuk ka lidhje me aktivitete kriminale, për të cilat akuzohet.
Burimet thonë se, gjatë seancës, mbrojtja ka këmbëngulur se paratë e sekuestruara në mjetin e Orest Sotës nuk kanë lidhje me aktivitete kriminale të ishministrit Tahiri. Dy avokatët e Sotës kanë paraqitur provat e tyre se paratë ishin kursime të Lefter Sotës, i cili i kishte përfituar edhe nga shitja e disa aksioneve që kishte pasur në një bankë të nivelit të dytë.
Këto para, sipas mbrojtjes, do të dërgoheshin si garanci te firma “Kurum” në Elbasan, për të marrë në shkëmbim një sasi të madhe hekuri. Këtë, sipas tyre, e konfirmojnë edhe transaksionet bankare të një prej firmave të Lefter Sotës, e cila i ka paguar shumën e përafërt në disa këste gjatë muajve tetor-nëntor kompanisë turke.
Sipas tyre, marrëveshja për garancinë monetare është bërë verbalisht mes administratorit turk dhe Lefter Sotës, ndaj administratorët shqiptarë, të pyetur nga Prokuroria, nuk e kanë pranuar këtë fakt.
Dita e lirimit të Sotës përkon edhe me 26-vjetorin e lindjes. Biznesmeni u arrestua më 1 nëntor në Elbasan nga Policia, pasi nuk iu bind urdhrit për të ndaluar. Ai drejtonte mjetin pa patentë dhe në të u gjetën 863 mijë euro, së bashku me dy patenta detare që i përkasin ish-ministrit nën hetim, Saimir Tahiri.
Këto kanë ngritur më shumë dyshimet fillestare të Prokurorisë së të dyja rastet kanë lidhje. Megjithatë, mbrojtja pretendon se patentat janë harruar në mjet nga shoferi i Tahirit. Pritet tashmë të mësohet se cila do të jetë lëvizja e radhës nga ana e Prokurorisë së Krimeve të Rënda.
