Me urdhër të Kryeprokurores së përkohshme, Arta Marku, Prokuroria e Durrësit ka nisur dje hetimet për të zbardhur mënyrën se si u ekstradua Nezar Seiti, i cilësuar si “financieri” i Habilajve.
Në një kohë që Ministria e Drejtësisë insiston se ekstradimi ka qenë tërësisht i ligjshëm, organi akuzës ka nisur menjëherë verifikimet dhe hetimet disiplinore e penale për rastin, pasi sipas ligjeve në fuqi, Seiti s’mund të ekstradohej në një kohë që për të kishte procedim penal edhe nga Krimet e Rënda.
Për Nezar Seitin janë dhënë dy vendime nga gjykatat e Krimeve të Rënda që ai të qëndrojë në burg për procedimin penal në Shqipëri. E megjithatë, Seiti iu dorëzua antimafies italiane, duke ngritur shumë pikëpyetje për mënyrën e ekstradimit të tij. Ministria e Drejtësisë thotë se kërkesën për ekstradim të Nezar Seitit e ka marrë nga autoritetet italiane më datë 24.11.2017 dhe më pas ia ka përcjellë atë Prokurorisë së Përgjithshme.
Nga ana tjetër, rezulton se Nezar Seiti është arrestuar më datë 20.11.2017, pra katër ditë përpara se të vinte kërkesa për ekstradim nga Italia. Edhe pse është arrestuar pasi për të kishte një urdhërarrest ndërkombëtar nga Italia, që mban datën 12.11.2017, Prokuroria e Krimeve të Rënda kishte nisur procedim penal për Nezar Seitin që më 19.11.2017, pra, një ditë para se të arrestohej.
Neni 491 i Kodit të Procedurës Penale, që parashikon kushtet e mospranimit të kërkesës për ekstradim, thotë në pikën “ç” si vijon: Nuk mund të jepet ekstradimi kur ka filluar procedimi ose është gjykuar në Shqipëri edhe pse vepra është kryer jashtë shtetit. Pra ,në rastin e Seitit, Krimet e Rënda kishin nisur procedim me dosjen e ardhur nga Italia 5 ditë përpara se Ministria e Drejtësisë të merrte kërkesën për ekstradimin e Nezar Seitit.
Por hipotetikisht, po marrim rastin tjetër, kur Ministria e Drejtësisë nuk ka pasur informacion për nisjen e procedimit penal në ditën kur ka pranuar kërkesën e ekstradimit. Pasi ajo merr kërkesën, ia kalon prokurorit kompetent, që në rastin konkret, ka qenë prokuror i Prokurorisë së Tiranës.
Në kushtet që Gjykata e Tiranës ka dhënë vendim, edhe të formës së prerë për ekstradimin e Seitit, duket qartë se në dosjen e saj nuk ka pasur asnjë akt që e informonte për procedimin te Krimet e Rënda. Mirëpo, Kodi i Procedurës Penale parashikon edhe rastin e pezullimit të ekstradimit, pasi vendimi është marrë për ekstradim.
Konkretisht, Neni 500 për “Pezullimin e dorëzimit” pika 1 thotë: Ekzekutimi i ekstradimit pezullohet kur i ekstraduari duhet të gjykohet në territorin e shtetit shqiptar ose duhet të vuajë një dënim për vepra penale të kryera para ose pas asaj, për të cilën është dhënë ekstradimi. Por, Ministria e Drejtësisë, pasi dëgjon autoritetin procedues kompetent të shtetit shqiptar ose atë të ekzekutimit të dënimit, mund të urdhërojë dorëzimin e përkohshëm në shtetin kërkues të personit që duhet ekstraduar, duke përcaktuar afatet dhe mënyrën e veprimit.
Në këtë rast, Ministria e Drejtësisë nuk e ka marrë parasysh aspak autoritetin procedues kompetent të shtetit shqiptar, Prokurorinë e Krimeve të Rënda në këtë rast. Nga verifikimet e deritanishme, burimet thonë se Prokuroria e Krimeve të Rënda nuk është informuar në lidhje me ekstradimin e Nezar Seitit dhe nuk është pyetur për këtë procedurë.
Brenda organit qendror të akuzës, ka qenë përgjegjësi e Drejtorisë së Marrëdhënieve Juridiksionale me Jashtë që të bëjë verifikimet nëse personi i ekstraduar ka ose jo ngarkesa penale në Shqipëri, që pengojnë ekstradimin. Po kështu, edhe burgu ku gjendej i paraburgosur Nezar Seiti, duhet të njoftonte Gjykatën dhe Prokurorinë e Krimeve të Rënda në lidhje me vendimin e Gjykatës së Tiranës për lirimin për efekt ekstradimi të Nezar Setitit.
/panorama
