Në datë 15 shkurt përfundon procesi i regjistrimit të çdo leje legalizimi në bashkinë e Librazhdit. Kjo u konfirmua gjatë përurimit të ambienteve të reja të Zyrës Vendore të Regjistrimit të Pasurive të Paluajtshme në Librazhd, ku ishin të pranishëm Sekretari i Përgjithshëm i PS-së, Taulant Balla, njëherazi edhe drejtuesi politik i Qarkut të Elbasanit, së bashku me Drejtorin e Përgjithshëm të Hipotekave, Valdrin Pjetri.
Balla u shpreh se qeveria ka shpallur si prioritare transformimin e shërbimeve publike, si dhe rritjen e cilësisë së shërbimit ndaj qytetarëve. Sipas tij, ky investim është një premtim i mbajtur, pasi tashmë qytetarët e Librazhdit do të mund të marrin një shërbim më të mirë në kohë dhe cilësi. “Unë gjej rastin ta falënderoj këtë iniciativë të ndërmarrë pas porosisë që dha Kryeministri, që Zyrat e Regjistrimit të Pasurive kudo në vend, të jenë zyra shërbimi siç është kjo këtu ku janë të gjitha kushtet, eleminohen radhët dhe njeriu që vjen merr përgjigje ”, u shpreh Balla.
Nga ana e tij, Drejtori i Përgjithshëm i Hipotekave, Valdrin Pjetri ndau me banorët lajmin e mirë se brenda datës 15 shkurt përfundon procesi i regjistrimit për çdo leje legalizimi në bashkinë Librazhd. “Për Zyrën Vendore të Regjistrimit të Pasurive të Paluajtshme Librazhd në bazë të planit të punës të miratuar nga zyra qendrore dhe të sjellë nga Drejtoria Rajonale këtu në Librazhd, në datë 15 shkurt përfundon procesi i regjistrimit të çdo leje legalizimi në bashkinë Librazhd. Më në fund qytetarët, të cilët kanë vite që presin për të marrë dokumentin e pronësisë për lejen e legalizimit, me datë 15 shkurt do të regjistrohet leja e fundit e legalizimit në Bashkinë Librazhd. Ky është një lajm i mirë që unë dua ta ndaj sot me ju”, u shpreh ai.
