Përmes një deklarate për mediat, kreu i ALUIZNI-t, Artan Lame njoftoi qytetaret që kanë banesa apo objekte të ndërtuara para vitit 1991 dhe që nuk zotërojnë dokumentin e pronësisë të paraqiten pranë zyrave të ALUIZNI-t duke nisur nga kjo e hënë për të aplikuar për legalizimin e këtyre banesave. Lame tha se numri i ndërtimeve që mendohet të trajtohen nga ky vendim i qeverisë është 40-60 mijë.
“Dhënie dokumenti për pronarët që kanë ndërtuar para vitit 1991 dhe nuk kanë dokumentin e pronësisë. Numri i banesave varion nga 40 deri në 60 mijë, pasi nuk është bërë një census për këtë kategori. ALUIZN-i do zbatojë vendimin e qeverisë. Duke filluar nga e hëna e kësaj jave, të gjithë qytetarët mund të paraqiten në sporteleve tona për t aplikuar për regjistrimin”- tha Lame.
Risitë kryesore të vendimit
1. Lehtësimi i barrës së aplikuesit, nga detyrimet dhe dokumentacioni i tepërt, (aplikuesi tanimë do të duhet të paraqesë vetëm kërkesën pranë ALUIZNI-t);
2. Zgjidhja e të gjithë pamundësisë së deritanishme, për të provuar periudhën e ndërtimit (para datës 10.8.1991), gjë që ka penguar finalizimin e procedurës;
3. Kalimi i pronësisë së truallit të ndërtesës falas deri në 300 metra katrore, si dhe mundësia për të blerë sipërfaqet mbi këtë masë.
Vendimi mban datën 18.07. 2018 “Për përcaktimin e procedures të kalimit të pronësisë dhe të regjistrimit të pasurive të paluajtshme të ndërtuara deri në 10.08.1991 dhe të truallit funksional të tyre”.
