Shkaqet e vdekjes së të riut Lear Kurti mbeten ende mister. Në një kohë kur policia deklaroi se 32-vjeçari kishte ndërruar jetë në spital, bluzat e bardha të Traumës e kanë mohuar këtë fakt duke u shprehur se ai ka mbërritur i vdekur.
Sipas AMP, patrulla e Komisariatit nr.3 i ka kërkuar të Lear Kurtit që t’i jepte ID, por ky i fundit ka ikur me vrap dhe është kapur në rrugën “Lord Bajron” nga efektivët.
Sipas Neës24, patrulla e policisë e ka ndjekur të riun për rreth 7-8 minuta derisa ai ka ndalur dhe më pas është shoqëruar.
Në këto momente ka pasur dëshmitarë, të cilët kanë thënë se “një patrullë e ka shoqëruar të riun pasi kanë qëndruar për 10 minuta në vendin e ngjarjes”.
Kamerat e sigurisë në biznese të ndryshme kanë filmuar dinamikën e ngjarjes, e cila mbetet ende e paqartë.
Pamjet janë sekuestruar nga grupi hetimor, ndërsa dëshmitarët nuk janë marrë një pyetje nga policia.
Gjithashtu raportohet se janë sekuestruar edhe kamerat e sigurisë të Komisariatit nr.3 dhe janë marrë në pyetje mjekët në spitalin e Traumës.