Robert Trump, vëllai më i vogël i presidentit të SHBA-së, Donald Trump, ka ndërruar jetë në moshën 71 vjeçare, pasi kohët e fundit qëndroi në spital në New York.
Lajmin e konfirmoi presidenti Donald Trump, përmes një deklarate të bërë në Shtëpinë e Bardhë.
“Me hidhërim të thellë, njoftoj se vëllai im i mrekullueshëm, Robert, paqësisht u nda nga kjo botë. Ai do të jetë një mungesë e madhe, por ne do ta takojmë sërish. Kujtimet e tij do të mbesin të gjalla në zemrën time përgjithmonë. Robert, të dua shumë. Pusho në paqe. Ai nuk ishte vetëm vëllai im, ai ishte shoku im më i mirë”, tha Donald Trump, në një deklaratë të shtunën.
Mediat raportuan se Robert Trump ishte në gjendje të rëndë në spital, por nuk u dha informacion nëse vuante nga ndonjë sëmundje.
