Bashkimi Europian ka akorduar shifrën prej rreth 1 milion euro për restaurimin e tre objekteve të trashëgimisë kulturore në territorin e bashkisë së Durrësit.
Këto janë monumentet e parë me vlera arkeologjike dhe kulturore që do të restaurohen në qytetin antik në kuadër të programit EU4CULTURE, ndërsa vlera e përgjithshme e mbështetjes nga BE për rijetëzimin e monumenteve të kulturës në Durrës parashikon shifrën prej 40 milion euro.
Drejtori i Qendrës Muzeore, Alban Ramohito tha për BIRN se punimet sapo kanë nisur te Kulla Veneciane dhe Hamami Mesjetar, që ndodhen në të dy krahët e Bulevardit “Epidamn”.
Sipas Ramohitos, një financim prej 90 mijë euro është akorduar vetëm për Kishën e Shna Ndout në Kepin e Rodonit.
Ndërhyrjet në monumentin e kategorisë “arkitekturë” thuajse kanë përfunduar. Ato kanë synuar punimet emergjente, restaurimin e dyshemesë, sistemin e kullimit e të drenazhimit, instalimet elektrike dhe disa ndërhyrje të tjera.
E ndërtuar në shekullin e 15-të Kisha e Shna Ndout, e cila ndodhet shumë pranë kalasë së Skendërbeut, në pjesën më veriore të bashkisë së Durrësit është një nga objektet më të vizituara nga besimtarët, si dhe nga turistët vendas dhe të huaj gjatë stinës së verës.
Ndërkaq, Torra Veneciane në Durrës është rrethuar me skelat, që mundësojnë punimet në fasadën e jashtme.
Kulla është një nga simbolet e mirënjohura të qytetit antik.
Arkeologët durrsakë gjatë sondazheve të kryera pranë saj me rastin e punimeve për ngritjen e mbikalimit ku u ndërtua “Veliera” në hyrje të portit arritën në përfundimin se Torra është ndërtuar gjatë periudhës së sundimit Osman.
Programi EU4CULTURE ka parashikuar një shumë prej 690 mijë euro për ndërhyrjet që do të kryhen edhe në brendësi të saj.
Sipas të dhënave që janë bërë publike, ndërhyrjet dhe restaurimi I kullës do të përfundojnë në qershor të këtij viti.
I njejti parashikim pritet të realizohet edhe për restaurimin e Hamamit mesjetar, ndërhyrja e fundit në të cilin i takon vitit 1982.
Por financuesit duhet të zgjidhin edhe vështirësinë e krijuar lidhur me pronësinë e truallit pranë godinës së hamamit.
Financimi i BE për këtë monument kulture arrin në rreth 265 mijë euro. Banja mesjetare e Durrësit është ndërtuar në shekullin e 18-të.
