Deputetja socialiste, Evis Kushi, ka reaguar pas deklaratës së deputetit Ralf Gjoni se Kuvendi është kthyer në një vatër infeksioni për përhapjen e Covid-19.
Ajo u shpreh se Gjoni u nxitua pasi masat në Kuvend janë zbatuar.
“Unë mendoj se kjo është deklaratë e nxituar pasi vetëm njëherë në javë jemi në parlament dhe mbledhjet e tjera të komisioneve ne i bëjmë online. Mund t’iu garantoj që Kuvendi është një nga institucionet që i respekton maksimalisht rregullat e vendosura.
Madje seancat e fundit unë mund t’iu garantoj që deputetët nuk janë lejuar të futen në sallë pa maskë. Në mënyrë të vazhdueshme kryetari i Kuvendit dhe zëvendës-kryetarja zonja Hysi, i tërheqin vëmendjen në mënyrë të vazhdueshmë të gjithë deputetëve të cilët nuk respektojnë rregullat, kushdo qofshin ata, qofshin deputetë, ministra, apo anëtarë të kabinetit. Unë iu garantoj që janë respektuar rregullat dhe zoti Gjoni nuk ka garanci për ta bërë një deklaratë të tillë.
Puna që ne kemi është që të jemi në terren dhe në takime të vazhdueshme me qytetarët, madje dhe kjo mund të jetë shkak për infektimin e deputetëve dhe jo Kuvendi.”- tha Kushi për FaxNews.
