Seanca e sotme në Gjykatën e Posaçme për çështjen “Plumbi i Artë” është shoqëruar me tensione dhe deklarata befasuese, ku për herë të parë është përmendur një emër i ri që, sipas të pandehurve, ka luajtur rol në sfondin e vrasjes së Emiljano Ramazanit.
Xhuliano Hoxha, një prej të akuzuarve në dosje, ka akuzuar publikisht të penduarin e drejtësisë, Erion Alibej, për fshehje të së vërtetës dhe për manipulim të procesit gjyqësor. Ai përmendi emrin e Megi Kilës, të cilën e cilësoi si “dashurinë e shekullit” të Alibejt, duke pretenduar se përmes saj, ky i fundit merrte informacione të vlefshme për lëvizjet e viktimës Emiljano Ramazani.
“Tregoje pak si e pyesje Megi Kilën për Emiljano Ramazanin? Pse nuk e përmend Megi Kilën, dashurinë e shekullit?”, deklaroi me tone të larta Hoxha, ndërsa iu drejtua Alibejt përballë trupit gjykues.
Në përplasjen verbale mes dy të pandehurve, Hoxha vijoi me akuzat:
“O palaço, njihemi që kur haje fara te shkallët e pallatit. S’kam lidhje me vrasjen e Bujar Çelës. Do të më fusësh në armiqësi me shokët e mi.”
Ai shtoi se në kohën e vrasjes së Çelës, ndodhej në shtëpi dhe akuzoi SPAK për një proces të padrejtë që, sipas tij, “po zhvillohet sipas dëshirës së Nuredin Dumanit dhe Erion Alibejt”.
“Më shumë se burg përjetë nuk keni çfarë të më bëni. Le të mbarojë deklarimet ai, pastaj kam unë për të thënë të vërtetën time,” përfundoi Hoxha.
Seanca vijon në mes të deklaratave kontradiktore dhe tensionit mes të akuzuarve, ndërsa trupi gjykues pritet të vendosë mbi vërtetësinë e rrëfimeve dhe rolin real të secilit në ngjarjet e rënda që kanë tronditur opinionin publik.
