Donald Trump nuk humbet kurrë një mundësi për t’u grindur me CNN-in. Ai e ka akuzuar për lajme të rreme, thotë se emisionet po shkatërrohen dhe sulmon gazetarët e tij. Viktima e tij e fundit nga CNN ishte Caitlin Collins, e cila në moshën 34-vjeçare është korrespondentja kryesore e rrjetit në Shtëpinë e Bardhë si dhe prezantuesja e një emisioni të përditshëm lajmesh.
Ajo e filloi karrierën e saj në gazetari si reportere arti për “The Daily Caller”, një faqe interneti lajmesh konservatore e themeluar nga Tucker Carlson, përpara se të merrte përsipër mbulimin e ngjarjeve nga Shtëpia e Bardhë.
Ajo u diplomua në Universitetin e Alabamës, nga ku është edhe vetë, në vitin 2014, me një diplomë në shkenca politike dhe gazetari. Në një intervistë, ajo ka thënë se familja e saj kishte pak interes për ngjarjet aktuale, përtej lajmeve lokale.
Në vitin 2017, ajo u transferua në CNN, duke mbuluar përsëri ngjarjet nga Shtëpia e Bardhë. Ajo u bë shpejt e famshme dhe disa vjet më vonë, në moshën 28-vjeçare, u bë korrespondentja më e re kryesore që CNN kishte pasur ndonjëherë në Shtëpinë e Bardhë.
Më vonë ajo nisi edhe emisionin e saj, “The Source”, i cili transmetohet çdo ditë në orën 9 të mbrëmjes. Nëse Trump sheh TV në një orar të tillë, ai ndoshta do të preferonte Fox News…
Revista “Time” e përfshiu gazetaren në vitin 2024 mes 100 personave që do të formësojnë të ardhmen. Portreti e paraqiste atë si një gazetare të palodhur, me një telefon që mbante në vesh gjatë gjithë kohës për të komunikuar me burimet e saj.
“Historia” e gjatë e sulmeve
Nëse Collins mund të pretendojë një “dekoratë”, është se në 5 vitet e tij në Shtëpinë e Bardhë, Trump është përplasur me Collins shumë herë, ndoshta më shumë se çdo gazetar tjetër.
Sulmi i fundit ishte rreth çështjes “Epstein”, pasi Trump iu përgjigj një pyetjeje që e shqetësoi duke thënë: “Je më e keqja” duke shtuar “Nuk të kam parë kurrë të buzëqeshësh. Nuk buzëqesh sepse e di që nuk po thua të vërtetën” – i tha ai. Kur Collins reagoi ai tha: “Është vërtet koha që vendi të ecë përpara, tani që asgjë nuk ka ardhur nga unë”.
Ajo nuk e humbi qetësinë për asnjë moment.
Dhjetorin e kaluar, Trump ia “kushtoi” asaj një nga postimet e tij të gjata në Truth Social, duke e quajtur “të ligë dhe budallaqe” kur ajo e pyeti për kërcënimet kundër Venezuelës.
Prillin e kaluar, pas një sërë pyetjesh në lidhje me deportimin e paligjshëm të një shtetaseje nga El Salvadori, për të cilën Gjykata e Lartë e SHBA-së vendosi se duhet të kthehet në SHBA, Trump e sulmoi sërish atë, duke e quajtur një “prezantuese të talk show me shikueshmëri të ulët” duke vënë në dyshim besueshmërinë e CNN.
Në një rast tjetër, ai u bezdis nga një pyetje që ajo bëri në lidhje me Joe Biden.
Në vitin 2018, ajo u pezullua përkohësisht nga Shtëpia e Bardhë për shkak se e pyeti Trumpin rreth lidhjeve të tij me Presidentin rus Vladimir Putin.
Në vitin 2023, në një forum në New Hampshire për votuesit republikanë, Collins e pyeti Trumpin rreth pretendimeve të tij se zgjedhjet e vitit 2020 ishin “të vjedhura”. Gjatë gjithë bisedës 70-minutëshe, Trump shpesh e humbi durimin me gazetaren, duke e quajtur në një moment atë një “person të lig”.
Vetë Collins nuk duket e shqetësuar. Në një intervistë me “New Yorker”, ajo tha se që nga fillimi i karrierës së saj, motoja e saj ka qenë “nuk ka të bëjë me mua”. “Nëse i lejon të ta bëjnë personale, ke humbur tashmë”, – thotë ajo.
