Në Shqipëri ndoshta nuk e njeh askush, por në Francë artdashësit dhe kritikët e shikojnë me adhurim. Marie- Anxhe Nguci është vetëm 20 vjeç, por ka detyruar edhe mediat më prestigjioze franceze që të kthejnë kokën drejt saj. Vajza shqiptare konsiderohet si një nga talentet më premtuese të brezit të saj.
Dy muaj më parë ajo ka publikuar albumin e parë me muzikë klasike dhe sipas “Le Figaro”, plotësia është ndjesia e parë që përcjellë albumi i saj. Ndërsa në Shqipëri ndoshta në të ardhmen do të dëgjojmë më shumë për të, mediat franceze vlerësojnë se pianistja shqiptare me një mjeshtëri të rrallë kombinon përvojat muzikore dhe duket se asgjë nuk e “zbut” etjes së saj për zbulimin dhe kërkimin e territoreve të reja të shprehjes përmes muzikës.
Marie-Ange Nguci, photographed by Chris Lee in NYC, 11/8/15.
Vetë Maria- Anxhe Nguci ka treguar se ka filluar cellon dhe pianon në të njëjtën kohë në Shqipëri, por në fund, piano fitoi. Shqiptarja ka marrë masterin për piano në konservatorin e Lartë të Parisit kur ishte vetëm 16 vjeçe dhe ka fituar disa çmime mjaft të rëndësishëm ndërkombëtar. Në albumin e saj të parë ajo prezanton një program mjaft të ngjeshur dhe ambicioz si në planin teknik ashtu dhe atë muzikor.