Kukësi voton sot për kryebashkiakun e ri. Në garë janë kandidati socialist Albert Halilaj, i cili garon përballë Emri Vatës, kandidat i Aleancës ‘Bashkë Fitojmë’, pasi PD-ja zyrtare nuk mori pjesë në votime. Ashtu siç e përcakton dhe rregullorja e KQZ-së, qendrat e votimit janë hapur që prej orës 07:00, ndërsa do të qëndrojnë të hapura deri në orën 19:00. Nga raportimet live për News24, gazetari Osman Stafa raportoi se procesi deri më tani po ecën shumë qetë, ndërsa identifikoi disa problematika. Ai tha se ka pasur raste të votimeve familjare, ndërsa shtoi se një tjetër problematikë lidhet me faktin se ka një lloj dhënie të informacionit personal kur qytetarët shkojnë për të votuar.
“3500 votues kanë marrë pjesë deri më tani. Një problematikë lidhet me faktin se ka një lloj dhënie të informacionit personal kur qytetarët shkojnë për të votuar. Jashtë qendrave të votimit që qëndrojnë persona që mbajnë lista, dhe pas identifikimit, ata shënojnë emrat e atyre që votuan. Ndërkohë problem është dhe votimi familjar.”, tha Stafa.
