Prej disa ditësh vendi ynë ndodhet nën ndikimin e kushteve të qëndrueshme atmosferike, ku do të jenë dominuese në vendin tonë edhe gjatë ditës së premte. Parashikohet që deri në orët e mesditës një pjesë e mirë e Shqipërisë të jetë në mbizotërimin e intervaleve të gjata me kthjellime, por më të dukshme do të jenë në ultësirën perëndimore.
Ndërsa pasditja dhe kryesisht mbrëmja do të shtojnë vranësirat në të gjithë territorin, ku më të fokusuara vranësirat do të jenë në zonat veriore. Temperaturat e ajrit do të vijojnë të rriten ndjeshëm në mëngjes dhe në mesditë duke u luhatur nga 1°C deri në 20°C. Era do të fryjë mesatare dhe e fortë në det me shpejtësi 45 km/h nga drejtimi Jugore duke sjellë në brigjet detare dallgëzim 3 ballë.
Kosova
Republika e Kosovës parashikohet të jetë në mbizotërimin e kthjellimeve dhe kalimeve të pakta të vranësirave përgjatë të gjithë ditës, ku kthjellimet parashikohet të jenë më të dukshme në orët e para të ditës në zonat perëndimore dhe Jugore të vendit. Ndërsa gjatë pasdites dhe mbrëmjes pritet që vranësirat të shtohen gradualisht në gjithë territorin, ku më të dukshme do të jenë në zonat Veriore dhe në Lindore të vendit.
Maqedonia e Veriut
Deri në orët e pasdites një pjesë e mirë e MV do të jetë nën ndikimin e motit të kthjellët, por do të ketë dhe kalime të pakta të vranësirave të cilat më të dukshme pritet të jenë në zonat Lindore. Ndërsa orët e mbrëmjes do të sjellin shtim të vranësirave në të gjithë territorin e MV, duke bërë që në orët e vona të natës i gjithë vendi të jetë në dominimin e motit të vranët.
Rajoni dhe Evropa
Zhvillimi i ciklonit të Islandës do të diktojë kushtet e motit në pjesën më të madhe të kontinentit duke sjellë në Evropën Lindore dhe vendet Nordike vranësira dhe reshje në formë dëbore. Gjithashtu Britania e Madhe dhe Qendra e kontinentit parashikohet të jenë në dominimin e vranësirave të shpeshta dhe reshjeve të shiut. Ndërsa në mbizotërimin e kushteve të qëndrueshme atmosferike paraqitet Jugu i kontinentit, ku më të dukshme kthjellimet do të jenë në perëndim të Ballkanit./
