Ka zhvillime të vrullshme dinamike në hetimin e çështjes së pronave të padeklaruara dhe transaksioneve të errëta financiare të shitblerjes së pronave, të ish Kryeprokurorit Adriatik Llalla. Pas dyshimeve të para dhe verifikimimeve paraprake, është vendosur që dosjes së “pastrimit të parave” për të cilën po hetohet ish Prokurori i Përgjithshëm, ti bashkohet edhe lista e pronave të padeklaruara nga bashkëpunëtorja e tij më e afërt, Rovena Gashi.
Shkak për këtë u bë dyshimi i arsyeshëm që lindi pas bërjes publike të fakteve për ish Drejtoreshën e Drejtorisë Juridiksionale me Jashtë në Prokurori, ku mediat zbuluan skandalin e fshehjes prej saj të një pallati të tërë në zonën e plazhit të Durrësit, të 14 apartamenteve tek Shkëmbi i Kavajës, dy godinave të mëdha për aktivitete të ndryshme biznesi, troje, toka, etj.
Fillimisht prokurorët e posaçëm të kësaj çështje që po hetohet nën kujdesin e posaçëm të Kryeprokurores Arta Marku dhe asistencën e SHBA dhe BE, e ngritën si dyshim idenë se një pjesë e këtyre pronave të padeklaruara dhe e të tjerave që ata po verifikojnë, mund të jenë të Llallës.
Kjo për faktin se numri i këtyre pronave ishte shumë i madh për të qenë vetëm të vartëses së Llallës. Duke qenë se raporti mes tyre ka qenë shumë i ngushtë besohet se bëhet fjalë për prona të rrjedhura nga pjesëmarrja e përbashkët në raste të mëdha korrupsioni gjatë ushtrimit të detyrës.
Pas disa verifikimeve paraprake, rezulton se dyshimet e Prokurorëve që po hetojnë Adriatik Llallën për “pastrim parash” janë mëse të arsyeshme. Kjo ide u forcua edhe më shumë pas ardhjes javën e kaluar nga SHBA të provave kundër ish Kryeprokrurorit, me anë të të cilave Departamenti Amerikan i Shtetit e futi atë dhe 3 pjestarë të tjerë të familjes së tij, në listën e zezë duke i ndaluar hyrjen.
Ndaj, hetimet për Llallën tashmë kanë marrë një kthesë të re, duke e shtuar akoma edhe më shumë listën e provave dhe bashkëpunëtorëve me të cilët besohet se ka arritur që të shfrytëzojë postin për të siguruar të prona por edhe para dhe sende të tjera me vlerë, e më pas për të ndërtuar një skemë për pastrimin e këtyre produkteve të veprës penale. E para në këtë listë besohet se është Rovena Gashi dhe pronat e saj të pa deklaruara.
Përgatiti: Alpenews.al
