Kompania Volkswagen njoftoi se, për shkak të krizës së madhe, po ndërpret disa marrëveshje kolektive, duke përfshirë edhe atë që është në fuqi në Gjermani që nga viti 1994.
Siç është paralajmëruar, Volkswageni ka njoftuar sindikatën IG Metall për ndërprerjen e të ashtuquajturit sigurimi i punësimit dhe sigurimi i të ardhurave të punonjësve.Nëse sindikata dhe gjiganti i industrisë së veturave nuk bien dakord për program të ri të mbrojtjes së punonjësve, Volkswageni do të ketë të drejtën të pushojë punonjësit për arsye operacionale nga korriku i vitit 2025.
“Ne duhet t’i mundësojmë Volkswagenit të ulë kostot në Gjermani në një nivel konkurrues në mënyrë që të investojë në mënyrë të pavarur në teknologji të reja dhe produkte të reja”, ka thënë drejtori i burimeve njerëzore të kompanisë, Gunnar Kilian.
Krahas kësaj kontrate, VW-ja ka ndërprerë edhe kontrata të tjera kolektive, duke përfshirë garancinë për punësim dhe rregulloren e punës me afat të caktuar.
Lidhur me këtë vendim është shprehur edhe negociatori në emër të sindikatës Thorsten Groeger, i cili ka thënë se nëse nuk arrihet marrëveshje deri në qershor 2025, Volkswageni do të ketë probleme të mëdha dhe do të përballet me rritje të ndjeshme të kostove.
“Nëse e humbim këtë kontratë do të hyjë në fuqi ajo që ka qenë aktive para vitit 1994. Kjo ndër të tjera parashikon orar më të gjatë pune me kompensim të plotë pagash, pauza shtesë apo shtesa më të larta për punën jashtë orarit dhe punën të shtunave”, ka thënë ai.
