“Bashkimi Europian do të vendosë sanksione ndaj 351 anëtarëve të Dumës së Shtetit dhe 27 personave fizikë dhe juridikë”, kështu ka bërë me dije kreu i diplomacisë europiane Josep Borell, pas vendimit të Rusisë për të njohur pavarësinë e rajoneve separatiste pro-ruse.
Ndërkohë edhe Norvegjia do të marrë pjesë në sanksione, ndonëse nuk është anëtare e Unionit.
Në një deklaratë të lëshuar pas takimit jozyrtar të ministrave të jashtëm të BE-së në Paris për çështjen e Ukrainës, Borell tha se ishte arritur një marrëveshje midis 27 anëtarëve të BE për paketën e propozuar të sanksioneve.
“351 deputetë të Dumës së Shtetit që votuan pro një vendimi të tillë do të preken nga këto masa. Gjithashtu, këto masa do të prekin edhe 27 individë dhe organizata të tjera”, tha shefi i politikës së jashtme të BE-së.
Gjithashtu ai theksoi se Putin nuk është përfshirë në listën e sanksioneve të BE.