Kreu i lartë i shtetit të Iranit Ayatollah Ali Khamenei fajësoi të martën armiqtë e Iranit për nxitje të trazirave në vend, pasi numri i të vdekurve nga ditët e protestave anti-qeveritare u rrit në 21.
Në fjalët e tij të para që nga shpërthimi i demonstratave të enjten e kaluar, Khamenei tha se do të fliste me popullin në kohën e duhur për ngjarjet e fundit, por se ishin “armiqtë” e Iranit të cilët sipas tij janë shkaktarët e protestave dhe dhunës.
Nëntë vetë u vranë të hënën, duke përfshirë shtatë protestues, një anëtar të një organizate pro-qeveritare dhe një polic. Dymbëdhjetë të tjerë u vranë gjatë fundjavës ndërsa protestat u bënë më intensive.
Rreth 450 vetë janë arrestuar gjatë tre ditëve të fundit, raportojnë mediat e Irakut, ku sipas tyre kjo është bërë sfida më e madhe për qeverisë që prej demonstratave masive në 2009.
Shkak i protestës ishte ekonomia e vendit dhe rritja e kostove të jetesës, por ato u zhvilluan në një protestë më të gjerë kundër qeverisë dhe u bënë më massive gjatë fundjavës.
Presidenti iranian Hassan Rouhani u përpoq të minimizojë rëndësinë e protestave, të cilat janë përhapur përtej kryeqytetit të Teheranit në të paktën 18 qytete.
“Kombi ynë i madh ka dëshmuar një numër incidentesh të ngjashme në të kaluarën dhe ka trajtuar me lehtësi ato. Kjo nuk është asgjë,” tha Rouhani në një takim me anëtarët iranian të parlamentit të hënën.
Por zyrtarë të tjerë kanë paralajmëruar për goditjet strikte dhe arrestimet massive të protestuesve tregojnë se qeveria është e shqetësuar.
Ali Asghar Nasser-Bakht, zëvendësguvernatori i Teheranit për çështjet politike dhe të sigurisë, paralajmëroi se “ata që dëshirojnë të mblidhen në publik duhet të marrin leje nga Ministria e Punëve të Brendshme dhe të jenë të vetëdijshëm se çdo shqetësim apo kërcënim publik është kundër ligjeve dhe ata nuk do të tolerohen. ”
Përgatiti AlpeNews.al
