Gjykata e Krimeve të Rënda vendosi ditën e djeshme që të lirojë nga burgu ish-kreun e ARRSH-së, Dashamir Xhikën. Ky i fundit mbahej prej muajsh në burg për skandalin e abuzimeve me rrugën “Tiranë-Elbasan”. Sot prokuroria e Krimeve te Renda e ka ankimuar kete vendim, duke kerkuar kthimin ne burg te Xhikes.
dashamir xhika rruge
Dje, gjyqtarja e Krimeve të Rënda, Ilirjana Olldashi, vendosi që të ndryshojë masën për Xhikën nga “arrest me burg” në “arrest shtëpie”. Mbrojtja ka argumentuar se Xhika ka probleme me shëndetin dhe nuk përbën rrezik për shoqërinë, nuk rrezikon të largohen apo të përsërisë të njëjtën vepër penale, për të cilën po hetohet.
Ndërkohë, hetimet për rastin vazhdojnë nga Prokuroria e Krimeve të Rënda. Dëmi i përllogaritur nga Prokuroria për abuzimet me tenderët dhe amendimet e kontratave me kontraktorët shkon në 37 milionë dollarë.
Përveç Xhikës, për rastin janë nën hetime dhe dy ish-drejtuesit e Njësisë së Menaxhimit të Projektit të Rrugës Tiranë-Elbasan, Aksel Qurduka dhe Albens Alite. Nga të akuzuarit, asnjëri prej tyre nuk ka pranuar akuzat. Tre ish-zyrtarët kanë bërë disa amendime të kontratave për ndërtimin e rrugëve, duke sjellë shtyrjen e afateve të tyre dhe për pasojë edhe dëme.
Gjithashtu, Prokuroria evidenton si një shkelje të rëndë edhe kryerjen e punimeve nga firmat e ndryshme, duke mos pasur më parë një burim financiar. Kjo shkelje është bërë me urdhër të drejtpërdrejtë të Dashamir Xhikës, ku në një moment të dytë është bërë likuidimi i firmave për punime të kryera më parë.
Ligji e ka të përcaktuar qartë se punimet kryhen pas lëvrimit të fondeve dhe jo para tyre. Prokuroria konstaton se Xhika ka shmangur edhe Bordin Drejtues të Autoritetit Rrugor Shqiptar. Një tjetër shkelje është edhe situata e krijuar pas rrëshqitjeve të dherave në vitin 2014.
Për këtë situatë, ka pasur vonesa në vendimmarrje për zgjidhjen teknike të problematikës nga Këshilli Teknik i ARRSH-së. Ndërkohë, që nga muaji mars i këtij viti, Dashamir Xhika po gjykohet edhe në Gjykatën e Elbasanit për një tjetër skandal abuzimi me rrugët. Bëhet fjalë për skandalin e abuzimeve me rrugën Gjinar-Elbasan, ku nën akuzë është edhe ish-drejtori tjetër i ARRSH-së, Andi Toma.
Dëmi për këtë rast përllogaritet në vlerën e 600 milionë lekë. Kujtojmë se edhe ish-kreu tjetër i ARRSH-së, Andi Toma, po hetohet i lirë. Ai është lënë në masën e sigurisë “detyrim paraqitje” nga Gjykata e Apelit të Durrësit dy muaj më parë.
