Që nga futja e masave për të kufizuar lëvizjen dhe aktivitetin për shkak të coronavirusit, niveli i ndotjes së ajrit është zvogëluar në zonat urbane në të gjithë Evropën, dhe kjo dëshmohet përmes imazheve satelitore.
Imazhet nga sateliti Sentinel-5 tregojnë një rënie në nivelet mesatare të dioksidit të azotit të dëmshëm në qytetet e mëdha, përfshirë Brukselin, Parisin, Madridin, Milanin dhe Frankfurtin, nga 5 deri në 25 mars në krahasim me të njëjtën periudhë të një viti më parë.
Kjo përkon me prezantimin e masave për të kufizuar trafikun rrugor, burimin më të madh të dioksidit të azotit dhe për të zvogëluar prodhimin në fabrikat që lëshojnë gaze të dëmshme në shumë vende evropiane për shkak të pandemisë coronavirus.
Pamjet e reja të publikuara nga Agjencia Evropiane e Hapësirës (ESA) dhe të analizuara nga Aleanca Evropiane e Shëndetit Publik (EPHA), tregojnë një densitet të zvogëluar të gazit të dioksidit të azotit, i cili mund të shkaktojë probleme të frymëmarrjes dhe kancer.
Në Madrid, nivelet mesatare të dioksidit të azotit kanë rënë 56 për qind në baza javore pasi qeveria spanjolle ndaloi të gjitha udhëtimet, përveçse atyre që janë shumë të nevojshme.
EPHA thekson se njerëzit që jetojnë në qytete të ndotur kanë më shumë rrezik të infektohen me Covid-19 sepse ekspozimi i zgjatur ndaj ajrit me cilësi të dobët mund të dobësojë sistemin imunitar.
