Matematicieni dhe ish-gjenerali izraelit, profesor Isaac Ben Izrael, kreu i programit të Studimeve të Sigurisë në Universitetin e Tel Aviv dhe kryetari i Këshillit Kombëtar për Kërkim dhe Zhvillim, ka dalë me një ide krejt të re për pandeminë e koronavirusit që ka pushtuar botën.
Në bazë të hulumtimeve që ka zhvilluar bashkë me një kolegun e tij profesor, Isaac Ben Izrael thotë se numri i rasteve të reja të virusit arrin kulmin pas rreth 40 ditësh dhe nis e bie vetë duke shkuar në zero pas 70 ditësh, pa marrë parasysh se cilën pjesë të botës godet dhe pavarësisht faktit nëse vendet i mbyllin ekonomitë e tyre ose jo.
Duke analizuar rritjen dhe rënia e rasteve të reja në vendet e ndryshme të botës, ai thotë se “ekziston një model i caktuar” i ecurisë së virusit dhe për këtë “numrat flasin vetë”.
Profesori e mbështet distancimin social, por mbylljen e ekonomive e konsideron të gabuar. Ai thekson se në rastin e Izraelit, rreth 140 njerëz vdesin çdo ditë normalisht. Sipas tij, mbyllja e ekonomisë së vendit për një virus që vret një apo dy persona në ditë, është një gabim rrënjësor që i kushton padrejtësisht Izraelit 20% të PBB-së së tij.
Prof.Gabi Barbash, ish-drejtori i përgjithshëm i Ministrisë së Shëndetësisë, këmbëngul se Ben Izraeli e ka gabim dhe thotë se numri i të vdekurve do të ishte shumë më i lartë nëse Izraeli dhe vendet e tjera nuk do të kishin ndërmarrë hapat e tyre.
“Unë kërkoj me forcë që të mos lejohen matematikanët – të cilët nuk dinë asgjë rreth biologjisë – të përcaktojnë se kur duhet ta heqim bllokimin”, u shpreh Barbash.
Pavarësisht polemikave, provesion Ben-Izraeli thotë se shifrat – veçanërisht nga vendet, si Singapori, Tajvani dhe Suedia, të cilat nuk morën masa kaq radikale për të mbyllur ekonomitë e tyre – vërtetuan teorinë e tij. Të njëjtën gjë ai thotë edhe për rastin e Nju Jorkut, ku rastet e reja kulmuan deri në 40 ditëshin e shfaqjes së virusit, dhe tashmë kanë filluar të bien. /e.s/
