Presidentja e Komision Evropian, Ursula von der Leyen tha se do të fillojë këtë javë një program të ri për të studiuar variantet e reja të COVID-19, me qëllim përgatitjen e vaksinave anti-COVID për gjeneratën e ardhshme.
Gjatë një interviste ditën e sotme Von der Leyen tha se programi i quajtur “Inkubatori HERA”, do të bashkojë autoritetet shëndetësore dhe laboratorët dhe do të ketë buxhetin e tij.
“Deri tani, dhe paralelisht me përpjekjet e bëra për vaksinat aktuale kundër COVID-19, ne duhet të ndihmojmë kompanitë industriale të zhvillojnë kapacitete prodhuese për vaksinat e gjeneratës së dytë,” shtoi presidentja.
Kryekomisionerja javën e kaluar pranoi dështimet e BE-së lidhur me shpërndarjen e vaksinave anti-COVID dhe se ky ishte një mësim shumë i mirë për të gjithë.
Variantet e reja të COVID-19, kohët e fundit po përhapen me shpejtësi tepër të madhe, duke sjell shqetësim alarmante në të gjithë botën. Për pasojë qeveritë e vendeve kanë ndërmarrë masa të reja anti-COVID me qëllim minimizimin e përhapjes së tyre në botë. Lufta kundër tyre është po aq serioze sa ajo kundër COVID-19, ndaj serioziteti në përballimin e tyre duhet të jetë i njëjtë.
