Mbretëria e Bashkuar ka hartuar një plan prej tre fazash për të lehtësuar bllokadën e koronavirusit që u vendos për herë të parë në fund të marsit.
Lajmin e ka bërë të ditur gazeta “The Times” në edicionin e saj të së mërkurës.
Qeveria pritet ta rishikojë bllokadën më 7 maj, por kryeministri Boris Xhonson e ka bërë të qartë se i druhet një vale të dytë epidemie.
Faza e parë e rihapjes do të përfshijë dyqane të vogla, ndërsa e dyta ato të mëdha dhe qendrat tregtare, me njerëzit që do të inkurajohen të shkojnë në punë.
“The Times” shton më tej se pabet, restorantet, hotelet dhe subjektet e argëtimit do të hapen të fundit.
Britania ka tejkaluar Italinë me numrin më të lartë të vdekjeve nga Koronavirusi në Evropë, me mbi 32 mijë njësi.
Shifra javore nga Zyra britanike e statistikave shtoi mbi 7 mijë vdekje të verifikuara në Angli dhe Uells, duke e çuar totalin në 32 mijë e 313.
Shifra është një sinjal i qartë se Britania mund të dalë si vendi më i prekur në Evropë, pavarësisht se u godit nga virusi më vonë se vendet e tjera.
