Arben Tanka, mjek pneumolog i Spitalit “Shefqet Ndroqi”, shprehet se parametrat e epidemisë së koronavirusit në Shqipëri duken të mira.
Në një intervistë për Ora News, Tanka ka thënë se nuk dihet periudha e saktë kur do të dalim nga kjo epidemi, por sipas tij po shkojmë drejt një dalje të ngadaltë e konstante.
“Ne kemi 10 ditë ku shifrat e shtrimeve janë konstante në dy spitalet. Numri i të shtruarve është rreth 40 persona, është një konstante e 10 ditëve të fundit. Mund të themi që situata është relativisht stabël. Parametrat e epidemisë për Shqipërinë duken goxha të mira. Shpresojmë që në ditët në vijmë që kjo kurbë që është e sheshtë të vazhdojë të ulët. Nuk dihet periudha e saktë kur do të dalim nga kjo epidemi, por siç duket po shkojmë drejt një dalje të ngadaltë, por konstante”, është shprehur mjeku Arben Tanka.
Më tej, ai ka folur dhe për gjendjen e pacientëve të shtruar në Spitalin Shefqet Ndroqi.
“Në spitalin tonë 4 pacientë janë në gjendje të stabilizuar. Nuk kanë nevojë për frymëmarrje të asistuar. Ndërkohë pjesa tjetër, 4 prej tyre janë në reanimacion. Gjendja në reanimacion është e rëndë dhe disa prej tyre janë të intubuar, pra kanë nevojë për frymëmarrje mekanike”, ka përmbyllur mjeku pneumolog Arben Tanka.
