Tefik Osmani gjithnjë e më shumë po kthehet në një pikë mjaft të rëndësishme për Skënderbeun. Pavarësisht se forca e ekipit është grupi dhe jo individët, duket qartë se ndryshimi në lojë me Osmanin si ekran në mesin e fushës, është mjaft evident. Kjo u pa mjaft mirë në ndeshjen e fundit të luajtur në Beograd, atje ku Skënderbeu vuajti mjaft në mesin e fushës pa mesfushorin korçar.
Akoma më shumë të drejtë këtij konstatimi i japin edhe dy ndeshjet e fundit të zhvilluara pas rikuperimit të dëmtimit nga ana e Osmanit. Me hyrjen e tij në fushë në takimin ndaj Teutës, Skënderbeu ndryshoi lojën dhe nga humbja 1-0 e ktheu takimin në 1-4 në favorin e vet. Po ashtu, edhe ndaj Luftëtarit, rregulloi balancat në mesin e fushës. Kjo tregon qartë se sa i rëndësishëm është mbrojtësi korçar, që prej kohësh luan në mesin e fushës për ekipin e Skënderbeut.
