Një sasi e konsiderueshme ilaçesh janë sekuestruar këtë paraditen në Kakavijë, pasi sipas policisë, nuk ishin të shoqëruara me dokumentacionin përkatës.
Uniformat blu bëjnë me dije se ilaçet po futeshin kontrabandë në vendin tonë, përmes një kamioni të drejtuar nga shtetasi K. D., i cili është arrestuar.
Njoftimi i policisë:
Kakavijë
Policia Kufitare parandalon dhe godet një rast të tentativës së kontrabandës me medikamente mjekësore.
Sekuestrohet një sasi e konsiderueshme ilaçesh të pashoqëruara me dokumentacionin përkatës.
Procedohet penalisht poseduesi i medikamenteve.
Në vijim të punës për goditjen e paligjshmërisë dhe krimeve ndërkufitare, si rezultat i kontrolleve të shtuara në kamionët në dalje dhe në hyrje në Pikën e Kalimit Kufitar Kakavijë, është parandaluar dhe goditur një rast i tentativës së kontrabandimit të medikamenteve mjekësore.
Punonjësit e Policisë Kufitare Kakavijë, në bashkëpunim me specialistët e Seksionit të Hetimit të Krimit Ekonomik dhe Financiar në DVP Gjirokastër, mbrëmjen e djeshme, gjatë kontrollit të ushtruar në hyrje, në mjetin tip kamion, të cilin e drejtonte shtetasi K. D., gjetën të fshehura në kabinën e mjetit një sasi të konsiderueshme medikamentesh mjekësore (ilaçe), të cilat ky shtetas ka tentuar t’i futë kontrabandë në Republikën e Shqipërisë.
Pas veprimeve të kryera hetimore, specialistët e Seksionit të Hetimit të Krimit Ekonomik e Financiar në DVP Gjirokastër referuan materialet në Prokurorinë pranë Gjykatës së Shkallës së Parë Gjirokastër, për shtetasin K. D., 42 vjeç, banues në Dropull, për veprën penale “Kontrabanda me mallra të licencuar”.
(BalkanWeb)
