Klubi i Skënderbeut ka reaguar menjëherë mbi vërtetësin e lajmit të publikuar në disa media se korçarët janë dënuar me 10 vite nga kompeticionet evropiane. Ashtu siç “Eduasportin.com” raportoi pak më parë se nuk kemi të bëjmë me një vendim përfundimtar, por me një kërkesë të insepktorëve të UEFA-s, zyra për shtyp e klubit të Skënderbeut njofton se nuk kemi të bëjmë me një dënim të klubit Skënderbeu.
“Duke marrë shkas nga lajmet më të fundit të publikuara sot në mediat sportive mbi ekzistencën e vendimit të UEFA-s për dënimin e klubit të Skënderbeut, Klubi i futbollit ‘Skënderbeu’ dëshiron të informojë opinionin publik, se nuk ka aktualisht asnjë vendim të trupave gjykuese, disiplinore të UEFA-s për klubin e Skënderbeut. Shpjegojmë se dokumenti i publikuar nuk është aspak vendimi përfundimtar, por kërkesa për gjykim e inspektorëve të disiplinës së UEFA-s, drejtuar trupës së apelit, të Komisionit të Disiplinës dhe Etikës në UEFA. Duam të qartësojmë se ky është një apelim i inspektorëve ndaj vendimit të marrë pothuajse dy vite me parë ndaj Skënderbeut në bazë të nenit 34(3) të statutit të UEFA-s dhe jo një çështje e re kundër klubit. Kjo procedurë është konform nenit 29/3 të kodit të disiplinës së UEFA-s, gjithashtu ju bëjmë me dije se kemi të bëjmë me një çeshtje disiplinore në proces për të cilën nuk është caktuar ende një seancë dëgjimore. KF Skënderbeu është njohur me kohë për këtë akuzë të inspektorëve të disiplinës. Sektori juridik i KF Skënderbeut po ndjek proçedurat e nevojshme juridike për çështjen në fjalë dhe shprehim sigurinë tonë që çështja do të mbyllet me sukses”, thuhet në komunikatën për shtyp të Skënderbeut./EDS/
