Në orët e para të kësaj mërkure në qytetin ukrainas, Kiev, janë dëgjuar disa shpërthime.
Sipas kryetarit të Bashkisë, Vitali Klitscho, shpërthimet kanë goditur qarkun Shevçenkivski dhe shërbimet e emergjencës kanë dalë në vendin e ngjarjes.
Nga ana tjetër Guvernatori i Kievit, Oleksiy Kuleba, tha se sistemet e mbrojtjes ajrore janë funksionalizuar. Shpërthime të fuqishme janë dëgjuar pak kohë pas lëshimit të sirenave paralajmëruese për sulme ajrore.
Që nga muaji tetor, Rusia vazhdimisht ka shënjestruar infrastrukturën e energjisë ukrainase.
Kreu i qytetit të Kievit, Klitschko, shtoi se sistemet e mbrojtjes ajrore kanë rrëzuar 10 dronë Shahed, të prodhimit iranian.
Autoritetet ushtarake në qytetin e Kievit thanë se fragmente të një droni kanë goditur dy ndërtesa administrative që gjenden në qendër të qytetit. Ende nuk dihet nëse ka viktima. Për shkak të sulmeve ruse ndaj infrastrukturës energjetike, shumë ukrainas po përballen me reduktime të energjisë.
