I burgosur prej dy muajsh nën akuzën e korrupsionit, gjyqtari Shkëlqim Miri ka kërkuar sërish lirinë në Gjykatën e Krimeve të Rënda. Miri pretendon se është i sëmurë nga një tumor, ndaj ai ka kërkuar që të lirohet, duke deklaruar se i rrezikohet jeta në qelinë e burgut. Kërkesa është depozituar nga Ardian Visha, avokati mbrojtës i gjyqtarit, i cili shprehet se, “gjyqtari Miri është në gjendje të rëndë dhe tashmë është shtruar në një spital privat”.
Për këtë arsye, Gjykata e Krimeve të Rënda ka caktuar dy ekspertët për të vlerësuar gjendjen e tij shëndetësore. Ekspertët e mjekësisë ligjore kanë kërkuar edhe një javë kohë për të kryer ekzaminimet për gjyqtarin Shkëlqim Miri.
Gjyqtari i gjykatës së Apelit në Tiranë u arrestua në 10 nëntor me urdhër të Prokurorisë së Krimeve të Rënda, me akuzën e shpërdorimit të detyrës dhe korrupsionit pasiv. Ndërsa gjatë kontrollit ë banesë, Mirit iu gjetën 340 milion lekë të vjetra, të pajustifikuara.
Prokuroria kishte vënë në hetim gjyqtarin pas dyshimeve se kishte marrë ryshfet 20 mijë euro për të liruar nga burgu Gentjan Dodën, i dënuarin për dy vrasje në vitin 1997. Vetë gjyqtari ka deklaruar se paratë ishin një pjesë të një të afërmi për blerjen e një prone dhe pjesa tjetër për mbulimin e kurimeve për shkak të tumorit në tru.
