Paraditen e sotme është mbledhur Këshilli i Lartë i Drejtësisë. Report Tv mëson se në rendin e ditës janë disa tema, që pritet të sjellin debat. Në pikën e parë është kërkesa e Ministrisë së Drejtësisë për shkarkimin nga detyra të gjyqtarit të Administratives në Shkodër, Ahmet Jangulli.
Pika që parashikohet të sjellë debat është ajo mbi raportin e Inspektoratit mbi gjendjen e gjykatave në Shqipëri. Numri i gjyqtarëve është i reduktuar në disa gjykate, për shkak të shkarkimeve nga Vettingu dhe largimet. Gjykata e Kavajës dhe e Lushnjes kanë më pak se 5 gjyqtarë.
Raporti i Inspektoratit do të nxjerrë në pah realitetin ku ndodhet situata e gjykatave shqiptare. Ndërsa një tjetër pikë që është pjesë e rendit të ditës është ajo kërkesa e magjistratëve për emërim. Kujtojmë që në mbledhjen e pak javëve më parë pati mjaft debate në KLD, pasi u rrëzua kërkesa e Ministres së Drejtësisë për shkarkimin e tre gjyqtarëve. Mësohet se ka debate të ashpra në mbledhje.
