Gjyqtari i Gjykatës së Apelit në Durrës, Besim Trezhnjeva, do t’i nënshtrohet ditën e sotme procesit të Vettingut. Komisioni i Pavarur i Kualifikimit do të zhvillojë sot seancën për rivlerësimin e gjyqtarit Trezhnjeva, që do të nisë në orën 10:00.
Mësohet se Trezhnjeva kandidon për Këshillin e Lartë të Gjyqësorit.
Besim Trezhnjeva është gjyqtari i tretë që kalon në procesin e Vettingut, ku do të vlerësohet për burimin e pasurisë dhe pastërtinë e figurës. Më parë, në ‘rrjetën’ e Vettingut kanë kaluar dhe gjyqtarët Fatos Lulo dhe Vitore Tusha të Gjykatës Kushtetuese.
Fatos Lulo nuk e kaloi procesin e rivlerësimit, duke u bërë ‘kurban’ i Vettingut, pasi nuk justifikonte pasurinë prej rreth 500 mijë dollarë, ndërsa nga ana tjetër, gjyqtarja Vitore Tusha rezultoi e pastër, duke vijuar e lirë detyrën.