Gjatë Asamblesë Zgjedhore të Federatës Shqiptare të Futbollit, që është mbajtur dje në Durrës, përveç rikonfirmimit të Armand Dukës në krye të institucionit të futbollit në vend, është votuar edhe për anëtarët e Komitetit Ekzekutiv. Në raundin e parë të votimeve janë përzgjedhur pesë emra dhe në të dytin katër të tjerë.
Mes kandidatëve ka qenë edhe Kristian Gjidodaj, aktualisht kryetar i Këshillit Bashkiak të Lezhës. Ky i fundit, në bazë të procesverbalit të mbajtur gjatë numërimit të votave për anëtarët e KEsë, pretendon se është fituesi i fundit. Pasi mediat publikuan listën e fituesve dhe në të mungonte emri i tij, Gjidodaj ka kontaktuar gazetën “Panorama Sport” për të dhënë variantin e tij.
Ai pretendon se kemi të bëjmë me një lapsus të komisionit të numërimit, pasi në bazë të votave është ai fituesi dhe jo Edmond Spahiu (ky i fundit fitoi me 18 vota).
“Në momentin që po numëroheshin votat për anëtarët e Komitetit Ekzekutiv, isha duke ndjekur procesin në televizor dhe, në bazë të numërimit që kam bërë, isha fitues. Por, një gjë e tillë nuk ka rezultuar në fund, ku unë nuk isha në listën fituese të 9 anëtarëve”, u shpreh fillimisht lezhjani.
NDRYSHIMI – Menjëherë pasi është njohur me rezultatin e dalë nga komisioni i numërimit, ku nuk rezultonte fitues, Gjidodaj ka kërkuar rinumërim, pasi pretendon se Spahiu kishte 3 vota më pak se ai. “I kam kërkuar komisionit menjëherë që të hapeshin edhe njëherë votat dhe të rinumëroheshin për pretendimin që kisha.
Një gjë e tillë ndodhi dhe unë në fund rezultova fitues me 17 vota, ndërsa kandidati tjetër Spahiu kishte 14 vota. Anëtarët e komisionit më konfirmuan se të hënën do të hartojnë një tjetër procesverbal për të rregulluar këtë lapsus që është bërë dhe unë do të jem në listën fituese të anëtarëve të Komitetit Ekzekutiv të FSHF-së”, përfundoi Kristian Gjidodaj, i cili mund t’u bashkohet 8 emrave të tjerë të këtij komiteti, që u shpallën fitues në zgjedhjet e zhvilluara dje. Në garën për 9 vende të Komitetit Ekzekutiv ishin 23 emra, të cilët vinin nga fusha të ndryshme.
