Mbyllet gjithçka në Kamëz. Partizani arrin të fitojë falë super golit të Bruno Telushit.
Partizani mposhti Kamzën në takimin e vlefshëm për javën e dytë të Kategorisë Superiore. Një super gol nga goditja e dënimit i Bruno Telushit në minutën e 67-të i dhuroi fitoren trajnerit Gega. Edhe pse shanset më të mira i kishte skuadra e Kamzës, ishte Partizani ai që festoi në fund.
Në sekondat e fundit të pjesës së parë, Plaku gaboi nga pika e bardhë e penalltisë, teksa gjuajtja u prit nga portieri Alban Hoxha. Në pjesën e dytë, të kuqtë patën 2 shanse të pastra me Prognin, por në të dyja herët Avdyli ka bërë shpëtimtarin, duke i mohuar golin e dytë të kuqve.
Një fitore e rëndësishme për skuadrën e Gegës, e cila në ndeshjen e ardhshme do të presë Kastriotin, ndërkohë që Kamza do të udhëtojë drejt Durrësit për tu ndeshur me Teutën.