Një senatore amerikane ka deklaruar se është përdhunuar nga një oficer i lartë gjatë kohës që ajo shërbente në Forcën Ajrore. Senatorja Martha McSally ka qenë pilotja e parë femër e Shteteve të Bashkuara që fluturonte në zona lufte.
Deklaratën ajo e bëri teksa po fliste në një seancë ku diskutohej për sulmet seksuale dhe abuzimet në ushtri. Senatorja republikane nga Arizona tha se në atë kohë nuk e raportoi abuzimin që ishte kryer me të, pasi ndihej e turpëruar dhe e hutuar, madje nuk i besonte as sistemit.
“Kam qëndruar e heshtur për shumë vite. Por më vonë gjatë karrierës time, kur ushtria u përball me skandale dhe reagimet e tyre ishin të papërgjegjshme, e ndjeva të nevojshme që t’ua tregoja disa njerëzve. U largova nga shërbimi 18-vjeçar në Forcat Ajrore e dëshpëruar. Si shumë viktima të tjera të abuzimit, ndihesha sikur sistemi abuzonte vazhdimisht me mua”, deklaroi Senatorja McSally.
Në vitin 2010 ajo u largua nga Forca Ajrore e SHBA-së dhe i hyri politikës. Për dy mandate u zgjodh në Dhomën e Përfaqësuesve, ndërsa vitin e kaluar fitoi në Senat. Nuk është hera e parë që Martha McSally flet për abuzimet seksuale. Një vit më parë ajo tregoi një tjetër rast kur ka qenë viktimë e abuzimeve. Trajneri i saj në gjimnaz i kishte bërë presion për të kryer me të marrëdhënie seksuale kur ishte 17 vjeç, sipas Senatores.
