Julian Gjaçi, aktori i ri nga Mirdita që jeton në Shtetet e Bashkuara të Amerikës, pas dy javësh në spital ka fituar betejën me koronavirusin dhe ka shkuar në shtëpinë e tij.
Në një lidhje direkte me emisionin “Zonë e Lirë”, Gjaçi tha se të hënën kishte dalë nga spitali, ndërsa mjeku Pipero tha në studio se i riu nuk rrezikonte më dhe klinikisht konsiderohet i shëruar.
“Juliani klinikisht konsiderohet i shëruar. Do presim dhe dy javë të tjera për të bërë një tampon tjetër, që të quhet i çliruar nga koronavirusi. Ajo që do i këshilloja Julianit është të lëvizë, të pijë 1 litër e gjysmë lëngje në ditë. Askush nuk e di do kthehet apo jo koronavirusi, por Juliani nuk rrezikon më sepse studimet tregojnë se virusi krijon prodhimin e anti-korpeve. Virusi nxit prodhimin e antitrupave që shpresojmë që me kalimin e kohës të kthehen në një mbrojtje optimale. Ka shumë mundësi ta kemi valën e koronavirusit, por nuk do kemi agresivitetin e të parës”, ka thënë mjeku Pipero për Julianin.
