Partia Demokratike nuk e përjashton futjen e deputetëve në grevë urie, si një nga format e protestës për atë që ajo e quan masakër e zgjedhjeve të 11 majit.
I pyetur në përfundim të seancës parlamentare nëse greva e urisë është një opsion, Berisha u përgjigj: “të gjitha format e qëndresës janë të pranueshme”. Më herët, para nisjes së seancës së parë parlamentare pas zgjedhjeve të 11 Majit, Berisha tha se opozita ka vetëm një strategji, rikthimin e votës së lirë të shqiptarëve.
Kësaj i thonë kur parlamenti shndërrohet në bodrum të mafias. Parlamenti nuk respekton asnjë rregull as të rregullores, as të kushtetutës, as ligjet. Parlamenti përdoret si dyqan privat i partisë së krimit, kjo ishte seancë ndër më të turpshmet.
Pas një farse elektorale të paprecedentë, në vend që qytetarët të dëgjonin të gjithë faktet dhe argumentet e opozitës për atë që ndodhi në 11 maj, këta ia mbathin brenda disa minutave. Ja ikën. Ishte shumë më e drejtë që në parlament të vijnë bosët e karteleve se këta, se ata janë të vërtetë, këta janë thjesht shërbëtorë të tyre. Megjithatë, ajo që duhet të garantoj shqiptarët është vendosmëria e opozitës për të mbrojtur kauzën e drejtë të tyre për votën e lirë.
Strategjia e Opozitës është përfaqësimi i kauzës së drejtë të shqiptarëve për votën e lirë. Ka vetëm një strategji, ka vetëm një objektiv, rikthimin e votës së lirë të shqiptarëve në kushtet e një narkoshteti të dominuar tërësisht nga kartelet më të fuqishme në Europë”, tha Berisha.
