Niveli i lartë i mbeturinave në anën kineze të Malit Everest, ka detyruar autoritetet që të mbyllin kampin bazë të turistëve. Ky i fundit do të lejohet të përdoret vetëm nga alpinistët që kanë leje për t’u ngjitur në majën më të lartë të botës, mbi 8 mijë metra lartësi. Vetëm pranverën e kaluar, në kampin kinez në Tibet, u pastruan 8 ton mbetje.
Kina ka mbyllur kampin e saj të turistëve në malin e Everestit, për vizitorët që nuk kanë leje ngjitjeje.
Sipas autoriteteve, kjo masë e pazakontë është marrë për t’u përballur me problemin në rritje të mbeturinave në vend.
Turistët mund të shkojnë deri tek manastiri Rongbuk që ndodhet poshtë kampit bazë, rreth 5 mijë m mbi nivelin e detit.
Ndërsa alpinistët që kanë leje për t’u ngjitur në majën e lartë mbi 8 mijë m, do të lejohen që të përdorin kampin bazë.
Ndonëse më të shumtë janë ato që vizitojnë malin Everestin nga ana jugore në Nepal, viteve të fundit, numri I turistëve ka ardhur në rritje të qëndrueshme edhe në anën kineze të malit.
Kampi bazik kinez, i vendosur në Tibet, është i popullarizuar pasi është i arritshëm me makinë, ndërsa kampi nepalez mund të arrihet duke ecur përreth dy javë.
Për vite me radhë, pika më e lartë e botës po lufton me nivelin e lartë të mbeturinave.
Shoqata kineze e alpinizmit thotë se 40 mijë turistë vizituan kampin e saj në vitin 2015, ndërsa kampi i Nepalit arriti rekordin e 45 mijë vizitorëve në vitet 2016-2017, sipas Ministrisë së Pyjeve të Nepalit.
Në 3 operacione pastrimi të kryera pranverën e vitit të kaluar, u mblodhën 8 ton mbetje. Përpjekjet e pastrimit këtë vit, do të fokusohen edhe në heqjen e trupave të alpinistëve në zonën e ashtuquajtur të vdekjes mbi 8 mijë metra, ku për shkak të lartësisë dhe të ftohtit, kufomat kanë mbetur në mal për vite apo dekada.
