Kryeministri i vendit Edi Rama ka dalë sot në një konferencë të përbashkët me ambasadorin e Delegacionit të Bashkimit Europian, Silvio Gonzato, ku në fokus të saj është Raporti i Progresit 2024 për Shqipërinë, publikuar nga Komisioni Europian.
“Më vjen shumë mirë që sot marrim një raport shumë pozitiv, më pozitiv i gjithë këtyre viteve, dhe normalisht i tillë sepse e tillë është ecuria e vendit dhe konferenca e dytë ndërqeveritare afirmoi njohjen nga të gjitha institucionet dhe vendet e BE të përparimit të bërë nga Shqipëria.
Raporti është real dhe i balancuar dhe siç njeh progresin, shënjon me përpikmëri dhe piketat për hapat që duhen bërë më tej dhe çështjet që duhet të përqendrohemi për përmbushjen e kushteve për anëtarësim”, tha Rama.
Më tej ai u ndal në disa prej pikave të raportit, teksa shtoi se Shqipëria ka ende të meta, por po punon is “nxënës ambicioz”.
“Raporti bën një vlerësim të lartë të zbatimit të reformës në drejtësi dhe patjetër që ka pika që duhen adresuar dhe ende boshllëqe që duhen mbushur. Më shumë të drejtë vlerëson punën e SPAK, ndjekjen e hetimeve të thelluara të rasteve të korrupsionit, përfshirë dhe ato të profileve të larta politike dhe zyrtare.
Së dyti ekonomia dhe rritja e mirëqenies. Raporti e konfirmon edhe këtë vit vazhdimin e rritjes ekonomike të vendit dhe përgatitjen e Shqipërisë për një ekonomi tregu. Rritja ekonomike ka qenë një rritje e fortë siç thotë raporti, po ashtu rritja e turizmit dhe investimet në rritje, është fakt.
Së treti ka një pikë, është progresi i mirë dhe afrimi më shumë drejt kritereve për anëtarësim në fushën e energjisë.
Ne jemi nxënës ambicion në këtë proces, jemi të vetëdijshëm që për të marrë notën maksimale, vula e anëtarësimit në BE, kemi shumë akoma dhe të meta për të adresuar dhe jemi të bindur që kemi kapacitete për t’i adresuar, falë dhe bashkëpunimit të ngushtë me Komisionin Europian”, tha Rama më tej.
