Presidenti rus Vladimir Putin të enjten uroi Donald Trump për fitoren e zgjedhjeve presidenciale në SHBA, si edhe e lavdëroi atë për guximin e treguar kur një person i armatosur tentoi ta vriste atë.Ai theksoi se tani Moska ishte gati të bisedonte me presidentin e zgjedhur të Shteteve të Bashkuara.“Dëshiroj ta përgëzoj për zgjedhjen e tij si president,” i tha Putin klubit të diskutimit Valdai në vendpushimin e Detit të Zi të Soçit ditën e sotme.
Trump tha gjatë fushatës se ai mund të sillte paqen në Ukrainë brenda 24 orëve nëse zgjidhej, por ka dhënë pak detaje se si do të kërkonte t’i jepte fund luftës më të madhe tokësore në Evropë që nga Lufta e Dytë Botërore.
Putin tha se ajo që Trump kishte thënë në fushatë për zgjidhjen e krizës në Ukrainë meritonte vëmendje. Ai tha se nëse Trump dëshiron të rifillojë kontaktet, atëherë Rusia është gati për diskutim.
