“Gjërat që kam arritur deri më sot, unë i kam kërkuar, unë jam lutur. Jam lutur për familjen time, për profesionin tim, jam lutur edhe për gjërat më minimale. Unë lutem çdo ditë, për çdo gjë të mundshme.
Lutem shumë. Dhe pjesa më e madhe e lutjeve që kam bërë, Zoti m’i ka realizuar, edhe jam shumë mirënjohëse për këtë”.
Adelajda Xhamani ishte një besimtare e devotshme, e cila mirënjohjen dhe dashurinë për Zotin e shprehte hapur, ashtu siç kishte bërë edhe kohë më parë në një intervistë të dhënë për mediat.
31- vjeçarja, e cila u nda papritur nga jeta mëngjesin e kësaj të diele, rrëfente se agjëronte çdo vit sepse muaji i Ramazanit i dhuronte qetësi e pozitivitet. “Ramazani është muaji që më dhuron qetësi e pozitivitet… E kam nisur agjërimin në moshë të re. Duke qenë se unë vij nga një vend mysliman dhe pjesa më e madhe janë agjërues, kjo frymë u injektua edhe tek unë. Sigurisht kur u rrita unë i lexova librat fetarë, e studiova frymën time. E zgjodha që ta praktikoj sepse më bën të ndihem mirë dhe e dua fenë islame.”
Pavarësisht angazhimeve të shumta që ajo kishte, Adelajda nuk hiqte dorë nga agjërimi.
“Ka rasti që iftari më gjen me një kafe, por prap unë ndihem mirë. Më dhuron një qetësi dhe pozitivitet agjërimi, që nuk e ndjej në asnjë muaj të vitit. Bota e medias nuk është shumë e përkushtuar dhe shpesh edhe nuk të kuptojnë, megjithatë jo të gjithë”.
Gazetarja u nda nga jeta për shkak të një ataku në zemër, orët e para të mëngjesit të kësaj të diele. Në një reagim të shkurtër, policia tha se 31 – vjeçarja vuante nga epilepsia, megjithatë pritet që shkaqet e vdekjes të zbardhen nga ekspertiza mjeko – ligjore.
