Epidemiologu Dritan Ulqinaku thotë se situata në të cilën ndodhemi për shkak të COVID-19 është tashmë një lojë mes nesh dhe virusit që mund të fitohet nga ky i fundit nëse ne nuk respektojmë masat e thjeshta, që janë distanca fizike 1,5 metër dhe mbajtja e maskës.
Ulqinaku pohon se maska në fakt nuk mbron personin që e mban, por personat që ndodhen pranë tij. Epidemiologu tha se maskat e thjeshta, ato kirurgjikale, nuk mund të mbahen më shumë se 20 minuta, ndërsa sugjeroi përdorimin e maskave prej cohe të cilat duke u larë dhe hekurosur janë sipas tij, mbrojtëse shumë të mira.
“Nëse ruajmë distancën dhe mbajmë maskë në ambientet e mbyllura, numri i rasteve do të vijë duke u ulur, ose ndryshe do të ndodhë e kundërta. Gjithë ndërhyrjet e dhunshme që qeveria ndërmerr, si mbyllja apo ndalimi i aktiviteteve është frika që ne kemi nga shtimi i rasteve që mund ta bëjë të papërballueshme situatën.
Shteti ka detyrë thelbësore të mbrojë spitalet të paprekura nga COVID-19, pjesa tjetër është përgjegjësi e qytetarëve”, tha epidemiologu.
