Mbyllja e Gazës për gazetarët ndërkombëtarë nuk mjafton: Izraeli po shtrëngon aksesin në Rrip edhe për organizatat joqeveritare.
Të hënën, ministri izraelit i Mbrojtjes, Israel Katz, deklaroi në Knesset se ndalimi i hyrjes për reporterët e huaj mbetet në fuqi, pavarësisht kërkesës së Gjykatës së Lartë izraelite që qeveria të paraqiste deri më 4 janar një plan për lejimin e gazetarëve, pas ankesës së Shoqatës së Shtypit të Huaj në Jerusalem.
Sipas Katz, hyrja në Gaza është “tepër e rrezikshme”, duke përmendur faktin se gjatë dy viteve e gjysmë të fundit janë vrarë 260 gazetarë lokalë.
Ai fajësoi Hamasin për shkelje të përsëritura të armëpushimit, që sipas tij detyrojnë ushtrinë izraelite të reagojë menjëherë, duke rrezikuar jetën e gazetarëve dhe ushtarëve.
Ushtria, shtoi ai, kundërshton praninë e medias pasi marrëveshja e armëpushimit është e brishtë dhe mund të prishet në çdo moment. Mbetet të shihet reagimi i Gjykatës së Lartë në ditët në vijim.
Ndërkohë, autoritetet izraelite kanë vendosur kufizime të reja edhe për OJQ-të që veprojnë në zona ku kërkohet miratimi i Izraelit për hyrje, përfshirë Gazën dhe pjesë të Bregut Perëndimor. Sipas një rregulloreje të publikuar një vit më parë, që skadon sot, organizatat duhet të plotësojnë kritere të reja me natyrë politike për të marrë akreditim.
Vendimmarrja i është kaluar një koordinimi ndërministror të drejtuar nga Ministria për Çështjet e Diasporës dhe Luftën kundër Antisemitizmit.
Akreditimi refuzohet nëse organizata apo edhe një punonjës i saj akuzohet për një nga 13 shkelje, përfshirë thirrjet për bojkot të Izraelit, mohimin e tij si shtet hebre dhe demokratik, mbështetjen e terrorizmit, delegjitimimin e Izraelit, antisemitizmin apo mbështetjen e procedurave ligjore kundër qytetarëve izraelitë.
Mjafton një akuzë e vetme për të përjashtuar të gjithë organizatën.
Afati për aplikimet është sot, 31 dhjetor, por deri tani pak organizata kanë marrë përgjigje dhe edhe më pak kanë marrë leje. Autoriteti izraelit COGAT akuzon disa OJQ se kanë refuzuar të dorëzojnë listat e plota të punonjësve palestinezë për kontrolle sigurie, duke i cilësuar ato si jo transparente. Megjithatë, nga nesër rreth 200 organizata rrezikojnë humbjen e licencave dhe, nga 1 marsi, nuk do të mund të fusin staf ndërkombëtar apo ndihma bazë.
Mes organizatave të përjashtuara është edhe Save the Children, e akuzuar për “delegjitimim të Izraelit”. Organizata u ka bërë thirrje vendeve ndërkombëtare të ushtrojnë presion mbi qeverinë izraelite, duke paralajmëruar se këto masa përbëjnë “një dënim me vdekje për shumë fëmijë në Gaza”. Aktualisht ajo vazhdon punën vetëm përmes stafit lokal palestinez.
Edhe Mjekët pa Kufij, të cilët autoritetet izraelite i kanë akuzuar se kanë pasur “terroristë në staf” – akuzë e mohuar nga organizata – nuk kishin marrë ende asnjë njoftim zyrtar. Ata paralajmërojnë se përjashtimi i tyre do të kishte pasoja shkatërruese për popullsinë palestineze, duke theksuar se realizojnë rreth 3 mijë konsulta mjekësore në ditë, menaxhojnë 20% të shtretërve spitalorë dhe asistojnë një në tre lindje në Gaza.
Duke e cilësuar situatën si “katastrofike” dhe masat si “të paarsyeshme”, ministrat e Jashtëm të disa vendeve, përfshirë Kanadanë, Francën dhe Mbretërinë e Bashkuar, nënshkruan një deklaratë të përbashkët ku i kërkojnë Izraelit të lejojë OKB-në dhe OJQ-të të punojnë në mënyrë të qëndrueshme dhe të vazhdueshme në Rripin e Gazës.
