Pandemia, në valën e dytë të saj po godet sërish fuqishëm shtetet evropiane. Shtetet fqinje si Italia, Greqia, Mali i Zi, Maqedonia e Veriut kanë nisur kufizimet si pasojë e numrit të lartë të infektimeve dhe humbjeve të jetëve. Që prej ditës së shtunë, Greqia ashtu si u paralajmërua nisi ” lock-down” e dytë për këtë vit, i ngjashëm me atë të muajit mars.
Kjo karantinë sipas autoriteteve greke do të jetë fillimisht për 3 javë deri në 30 nëntor, ndërkohë që nuk dihet nëse do të vazhdojë edhe më tej nisur edhe nga situata epidemiologjike që do të jetë ne vend.
Qeveria e Mitsotakis teksa ka prezantuar masat kufizuese të këtij izolimi të dytë, ka prezantuar edhe masat ekonomike lehtësuese për kategoritë që nuk kanë të ardhura, apo edhe për ata që do të humbasin punën si pasojë e pandemisë. Qeveria greke do të japë 800 euro për ata që humbin punën në këto 3 javë izolim.
Gazetari Artur Bibe tregoi në ‘Wake Up’ në Top Channel si është situata në Greqi në këtë valë të dytë të pandemisë Covid-19.
“Situata nuk është e mirë, dje kishim rreth 2 mijë të infektuar. Frikshëm po arrin 800 numri i të vdekurve. Ndërsa 69 ndodhen në intubim, gjërat nuk shkojnë mirë, Greqia është vënë në alarm.
Vijon situata me policë gjoba, kontrolle shumë të rrepta. Është izolim, njerëzit vazhdojnë të shkojnë në punë, pra shkojmë ata që marrin një leje nga Instituti i Sigurimeve që janë në punë.
Jeta vazhdon, por me kufizime. Lokalet, baret, restorantet janë mbyllur. Dyqanet janë mbyllur, por punon vetëm sistemi i shpërndarjes me pica dhe sufllaqe.
Shkollat fillore dhe kopshtet janë të hapura dhe prindërit duhet të marrin leje të posaçme për të dërguar fëmijët në shkollë. Gjoba është 300 euro për ata që shkelin izolimin”, bëri të ditur Bibe.
