Presidenti i Maqedonisë, Gjorge Ivanov, për herë të tretë ka theksuar se nuk do ta dekretojë ligjin për përdorimin e gjuhëve. Kjo, siç thotë ai, për shkak të jo kushtetutshmërisë së ligjit dhe ndërgjegjes personale të tij si Kryetar Shteti.
Nga ana tjetër Kryetari i Kuvendit, Talat Xhaferi nuk jep detaje se si do të veprojë, apo nëse do të zgjedhë variantin e nënshkrimit të ligjit dhe dërgimin e tij në fletoren zyrtare edhe pa firmën e Presidentit.
Ai tha shkurt se formalisht afati i Presidentit ka skaduar dhe se, që nga sot gjithçka varet nga kompetencat e tij si kryetar ligjvënësi.
Xhaferi në “Kanal 5” foli edhe për dërgimin e ligjit në Komisionin e Venecias, për të cilin kujtoi se është organ këshillues pranë Këshillit të Evropës dhe se, “jo me doemos konstatimet e tyre duhet merren si detyrime”.
Përderisa çështja e Ligjit të gjuhëve mbetet “status quo”, opozita kërcënohet me padi ndaj kreut të Kuvendit. Ky i fundit rekomandon që për vlerësimin e kushtetutshmërisë dhe ligjshmërisë së ligjit kompetencat i takojnë Gjykatës Kushtetuese dhe se, secili që ka dyshime mund të ngrejë iniciative deri tek organi i autorizuar për mbrojtjen e Kushtetutës.
Ligji për përdorimin e gjuhëve fillimisht u votua më 11 janar. 6 ditë më pas, Ivanov njoftoi mos dekretimin. Mbi konstatimet e tij, VMRO-DPMNE-ja parashtroi mbi 35 mijë amendamente, por asnjëri prej tyre nuk u shqyrtua në Kuvend.
Më 14 mars, ligji u votua për herë të dytë me 64 vota “për” dhe 24 abstenim.
