Shefi i Policisë Bashkiake të Malësisë së Madhe, Mentor Hasanaj është transportuar drejt spitalit të Tiranës, pasi gjendja e tij shëndetësore është shumë e rëndë.
Ngjarja:
Atentat Shefit të Policisë Bashkiake të Malësisë së Madhe! Ngjarja ka ndodhur rreth orës 12:30 te Stacioni i Pompave, në Dobraç atje ku ndodhen “5 heronjtë e Vigut”. Mësohet se i plagosur ka mbetur Mentor Hasanaj 37-vjeç, shefi i policisë dhe babai i tij Xhelal Hasanaj 74-vjeç, ndërkohë ka shpëtuar mrekullisht e shoqja, Vjollca Hasanaj 28-vjeç. Hasanaj është plagosur rëndë, e për pasojë është dërguar me Urgjencë drejt Tiranës.
NJOFTIMI I POLICISË
Më datë 11.10.2020, rreth orës 12:30, në aksin rrugor Shkodër-Koplik, një person i paidentifikuar që qarkullonte me motomjet, ka qëlluar me armë zjarri në drejtim të mjetit të Policisë bashkiake Malësia e Madhe ku udhëtonin shtetasit M. H. 37 vjeç, V. H. 28 vjeçe dhe Xh. H. 70 vjeç, banues në Malësinë e Madhe.
Si pasojë janë plagosur shtetasit M. H, me detyrë Shefi i Policisë bashkiake në Malësinë e Madhe dhe Xh. H., i ati i tij, të cilët janë dërguar në Spitalin Rajonal Shkodër për ndihmë mjekësore
Shërbimet e Policisë me të marrë njoftim kanë shkuar menjëherë në vendngjarje dhe kanë ngritur pika kontrolli në akset rrugore dhe po kontrollohet zona ku dyshohet se ka lëvizur autori.
Në ndihmë të Policisë Vendore kanë shkuar edhe forcat e FNSH Shkodër ku vijon kontrolli masiv i territorit për të bërë të mundur kapjen e autorit.
Grupi hetimor ndodhet në vendngjarje dhe nën drejtimin e Prokurorisë po vijon punën intensive për grumbullimin dhe fiksimin e çdo prove që do t’i shërbejë zbardhjes së ngjarjes dhe indetifikimin e autorit.
