Ishte kthyer në tmerrin e bizneseve, kapet nga Policia e Sarandës i shumëkërkuari Shahin Abazi.
21-vjeçari Abazi, banor i qytetit të Sarandës, ishte person i shpallur në kërkim për grabitjen me armë të dy karburanteve në Sarandë dhe për një sërë vjedhjesh nëpër markete e dyqane, por edhe për vjedhje motorësh. I riu po tentonte të largohej nga Saranda, me autobus drejt Tiranës, në momentin e arrestimit. Pas informacionit të marrë, Policia e Sarandës është vënë në ndjekje të autobusit dhe e ka arritur atë në aksin nacional Sarandë-Gjirokastër. Pasi ndaloi autobusin, Policia bëri të mundur prangosjen e Abazit.
Burime policore të Sarandës thanë se 21-vjeçari ka pranuar në komisariat se ka qenë ai autori i grabitjes me armë, ndodhur më 28 dhjetor të vitit të kaluar, të dy pikave të karburantit në Sarandë. Pavarësisht se pamjet e kamerave të sigurisë tregojnë se grabitja është kryer në bashkëpunim me persona të tjerë, i riu nuk ka pranuar të japë emrat e bashkëpunëtorëve të tij. Abazi ka pranuar gjithashtu, të jetë pjesë e grupit të grabitësve me maska të marketeve dhe dyqaneve, të bëra muajt e fundit, po në qytetin e Sarandës. Ndërkohë, Abazi dyshohet të jetë autor edhe për vjedhje motorësh.
Sipas burimeve policore të Sarandës, 21-vjeçari Shahin Abazi ka qenë edhe më parë i dënuar për veprën penale të vjedhjes, ndërsa po hetohet edhe për disa ngjarje të tjera kriminale. Identifikimi i 21-vjeçarit erdhi nga pamjet e kamerave të sigurisë të pikës së karburantit. Filmimet tregojnë momentin kur dy grabitës me kapuç në kokë, rreth orës 06:49 minuta, hyjnë në pikën e karburantit jo nga rruga, por nga skarpata aty pranë dhe hyjnë te vendi ku qëndron punonjësi i karburantit.
Nën kërcënimin e armës, ata detyrojnë punonjësit që t’u dorë- zojë paratë e xhiros nga shitja e naftës dhe benzinës. Teksa njëri e kërcënon me armë tip pistoletë, tjetri i afrohet rojës me një thikë dhe nën kërcënimin e tyre, e neutralizojnë atë. Duke e mbajtur të mbështetur pas murit, grabitësit zhvillojnë kontrolle të shpejta të sirtarëve, por edhe në xhepin e punëtorit me uniformë.
Teksa zhvillojnë kontrolle, dukshëm të nervozuar, grabitësit godasin me shkelma sirtarët dhe më pas, njëri prej tyre, merr një telefon dhe largohen me shpejtësi nga vendi i ngjarjes. Në përfundim, dy autorët largohen nga njëjta rrugë nga erdhën. Nga marrja në pyetje e punonjësit të pikës së karburantit, ai deklaroi para oficerëve të Policisë se grabitësit kishin arritur të merrnin një shumë prej 16.000 lekë të reja në total.
